Хонанда Муниса Ризаеванинг 2015 йилги 19—21 октябрь кунлари Истиқлол» санъат саройида бўлиб ўтадиган концерти баннерлари чиқди, деб хабар қилади «Sayyod.com».

Баннердаги «Фонограмма орқали ижро этилади» ёзуви мухлислар ўртасида кўплаб мунозараларга сабаб бўлди. Аммо хонанданинг ўзи бу йилги концерти аслида жонли бўлиб, фақатгина электрон мусиқа (минус) фонограмма бўлишини маълум қилди.

«Афсуски, концерт дастурида озгина фонограмма мусиқа ишлатилса ҳам, демакки, баннерга жонли ижро деб ёзиш мумкин эмас. Концертни неча фоизи жонли ўтади, буни ҳам фарқи йўқ, шу сабаб бу йилги концерт дастуримдаги баннерларда фонограммадан фойдаланилади, деган ёзув бор ва мен ўзимни овозимга жавоб берган ҳолда жонли бўлишини маълум қиламан. Мусиқаларимда мураккаб электрон эффектлари мавжуд бўлгани сабабли минус тарзида мусиқасигина фонограмма бўлади.

Ўзингизни ҳам хабарингиз бор, бугунги кунда керак бўлса микрофонда махсус дастур орқали овозни «тозалаб» ўзгартириб берадиган мосламалар бор. Мен кимлардир каби жонли ижрода ҳам шу тариқа алдашни истамайман, очиғи. Боримча куйлаб, асосийси одамларни алдамай меҳнатимни кўрсатиб, концертга юз фоиз кучимни сарфламоқчиман», — деди Муниса Ризаева.




































Худди шундай воқеа Тошкентга Сергей Лазарев келганида бўлиб ўтиб, катта жанжалга сабаб бўлганди. Тошкентдаги баннерларини кўрган Сергей, фонограмма ёзувидан жанжал кўтарган.

«Нима учун сизларда мусиқада фонограмма фойдаланилса, бутун бошли концертни фонограмма деб ёздириш керак? Куйлаётган мен ва мени концертимдаги овозим жонли бўлса, нима учун баннерга фонограмма деб ёзилади? Ахир овозим жонли-ку!», — деганди россиялик хонанда.

«Жонли овоз ва мусиқаси фонограммада» деб ёзилиши тартибини мутасадди идоралар кўриб чиқиши керак, деб ҳисобламоқда «Sayyod.com» сайти.